PATHIAN MI DIK

Dated Tlangsam the 2nd Dec, 2012
“Ngai teh inthawina aiin thuawih chu a ṭha zawk a, Berampa thau aiin a thu pawm chu a\ha zawk a ni.” I Samuela 15:22

Isaac Zairemtluanga

Pathian awmpuinain Zoram kristianten hun rei tak rawngbawl hna thawkin leh amah ringin kan hun kan hmang a. Chutih laiin kan tunhun kan hman dan ah hian kristian Pathian hnung zuitu Pathian mi inti kan tam em em rual hian Pathian mi dik kan nih leh nih loh erawh kan in enfiah a hun ta hle mai.

Pathian mi dik lo chu a awmtheih reng em ni? Awm theih tehreng mai. Kan Pathian thu ah kan hmu a, “Beram pa thau aiin a thu pawm chu a ṭha zawk a ni”a tih angin kan ram ringtu Pathian mi ṭha leh dik tak karah chawhpawlh taka hun leh nun hmang kan tam em em a ni. Kan mimal nun kan han in en chiana kan in bihchian tak tak chuan rawngbawltu zingah ngei pawh Pathian duh dan leh a remruat anga awm aia mahni duh dan leh ngaihdan kal pui tam tak pawh kan awmin kan pung zel a nih hi. Amah ringtuten a thuawih mai tur kan nih laiin a thuawih aia mahni ngaihdan dahlal zawktu kan pung tial tial emaw tih thei a ni ta. Hei hian Pathian mi dik lo kan awm thei a ni tih a lang chiang hle a ni.

Engtiangin nge Pathian mi dik chu kan nih theih ang? Pathian rawngbawltu leh ringtute hian tih tur leh chanvo tam tak kan nei. Chu kan chanvo leh tih tur chu Pathianin a mite tih tur min tuk leh ruat a ni thin. Pathian mi dik ni tur chuan a thuzawm a, a duh dan leh remruat anga rawngbawl hna kal pui leh tih tur min ruat hlen chhuah hi Pathian mi dik nih theihna awlsam tak leh hnai ber chu a ni.

Pathian mi dik ni tur chuan a thu hria a , pawm a zawm mai tur kan ni a. Mahni duh dan leh ngaihdan a Pathian rawngbawl leh Kohhranho kaihhruai hi thil tih theih loh leh tih loh tawp tur a ni a. Pathian fak leh chawmawia a hnung zuitute pawh hian mahni ngaihdan leh duh dan maia a hnung zuia, amah fak leh chawimawi hi kan tih loh tawp tur a ni. Kan tunhun hman dan ah hian Kohhran mipuite hian Pathian mi dik kan nih leh nih loh hi kan inngaihtuah nawn fo a tulin a pawimawh tak zet zet a ni. Nang Pathian mi dik i ni em?