February 3-8, 2014 khan Damparengpui-ah missionary quarters saa work camp neih a ni a, hetah hian mi 28 kan kal thei a, a lawmawm hle a ni.
Thuhmasa
December 30, 2013 Thawh\anni a ni a. Kum thar thlirna Committee chuan kum 2014 chhunga Missionary hmun tlawha work camp neih an rel thlu rup mai. Committee a zo va, thurelte an han ngaihtuah chiang a, kuminah hian hmachhawp lian tak tak karah cheng tam tak sen ngaihna tur work camp an han rel tlu ringawt mai chu an huphurh rilru a ni. |henkhat phei chuan fiamthu-in, "Ramthar zinna tur pawisa kan neih loh leh Kohhran Ramthar huanah riakin kan hnatlang anga a ni mai alawm," ti tein an inhnem chawp a. Ngaihtuahna a buai a, kan huphurh tlang a ni.
Inbuatsaihna
January 4-ah kan Branch a\anga missionary kal chhuak Nl Lalengzauvi Colney a lo haw a, a awmna tur hmun Damparengpuiah missionary quarters sak tur a awm thu a sawi chuan hruaitute beng a verh hle a; mahse tunhnai maia sak tur a nih thu a chhunzawmna erawh chuan ngaihtuahna a tibuai hle mai. Kan hruaituten a hmuna thawktute an han be chiang a. February thla chawlhkar hmasa bera sak tur a nih thu an hriatin an lawm rualin sum leh pai rilru-ah a lo lang a, ngaihtuahna a buai lo thei lo a ni.
January 9-a Official Committee neih chuan Damparengpuia work camp neih chu a reltlu ta rup mai. Pawisa tam tak a \ul dawn avangin hruaitute rilru a buai a, inhlawhna an zawng nghal a. An hmu mai thei lo va; hla zir ban \awng\aina turah te inhlawhna turte kan dil hial a. Ti chuan mangan laia \anpui vartu hnai reng kan Pathian chuan kan \awng\aina te chhangin inhlawhna tur \ha tak tak min pe a. Ramthar zin hma hian khanghu huan sam te, boulder chap te, mei lam sial te leh balu la tein sum kan tuak a. Ti chuan Ramthar zin tur puala \anpuina kan dawn hrang hrangte bakah missionary puala kan sum dah\hatte pawtin zinna tur pawisa kan nei daih tain kan in-hre ta a ni.
Mahse, tu nge ka tan kal ang?
Pawisa chu awm tawh mah se, Pathian tana feh chhuak turin pawisa, hun leh mahni ngei inpek a \ul si. Kal tura in-report hun kan tih January 19 pelh hnuah pawh in-report kan la tlem hle. Branch Committee member a\angin thei lo tur an awm nual mai bawk si! A tawpah chuan mahni in lum, mahni hna kalsana sum sen belh pawh inhuama inpe thei mi 28 te chu fehchhuak turin an inpeih ta a.
Kan zin kawng chu
February 3, 2014 zing dar 4:30-ah chuan Biak Inah kan thawm nak nak a, kan han in-load fel a, kan inpeih meuh chuan dar 5:30 a lo pel tawh a. Kan represent Upa F. Lalsangliana’n \awng\aina-in min thlah a. Ti chuan dar 6-ah kan represent T/Upa H. Hmangaiha ho vin Biak In tual a\angin kan chhuak ta a.
Champhaiah thingphel ka load leh lawk a, kan kal char char a, guitar nen kan zai thla a, Tv Isaac-a (Bunglienkunga)’n hla a hril a, kan hlimpui dar dar hle mai. A hnung lamah kan leader Mahminga leh treasurer Pa Mawia te an \hu a, zin ngai lo tih takah an zun a chhuak deuh reng mai. An zun chhuak thawm a na ngei mai! "In din loh chuan buhfai chungah kan zung a ni mai" tiin an rawn inhawr phei tuau tuau zel mai chu din loh chi pawh a ni lo. Vawi 3 emaw vel kan zun hnu chuan Khawzawl kan thleng ta a. Khawzawlah kan ding lawk a, damdawite kan lei hnuin kan chhuak leh ta a. Damdawi ei lo Pu Ramenga’n bus a ten ta tlat mai a. A seat-ah pawh \hu peih lovin kawngkhar bulah a rawn phei a, a luak ta barh barh a, hnunglama \hu tlangval pakhat mawng a kham ta tlat mai! Khawzawl a\anga Tuivawl thleng a din hnu chuan chaw ei a lo hun ta a. Tuivawl kamah tuk\huan kan ei a, Pa Mawia’n an nu Kimchi siam tui tak mai chu intithei takin a rawn phawrh a, kan ei liam liam a, kan hlimpui khawp mai. Hnunglama zun chhuak \hinte pawh an ziaawm ta deuh a, tlangval mawng kham pawh a \hutna a fuh ta a niang, a tawp thlengin a \hu tluang thei ta! Ti chuan kan kal leh char char a, Bawngkawnah thil lei ngaite kan lei zawk hnuah dar 3:15 velah kan kal leh a, Rawpuichhip kan thlenin khua a thim \an a, kan kal zel a, Dapchhuah (Tut) te kal pel zelin dar 7:18-ah West Phaileng kan thleng a, zanriah kan ei a, Ti chuan 8:15-ah kan chhuak leh a, ti chuan darkar 15:45 zet kan zin kawng kan zawh hnuin Damparengpui chu zan dar 9:45-ah kan thleng ta a.
Thlen phatah tuboh nen!
Kan thleng chiah a, a hmasa ber atan kan motor chu an gate siamah a leng lo tlat. Hnathawk tura kal kan ni bawk a, tuboh nen kan che nghal a, gate ka \hiah hnuin mission compound-ah chuan kan lut thei ta a. Thingpui thlum tui tak nen min lo hmuak a. Mipa riahna tur Office-ah kan lut khawm a, kan Represent T/Upa H. Hmangaiha’n \awng\aina hun a hman hnuin hmeichhe lam paw’n an riahna tur hmun lam, quarters sak thar lam an pan ve ta a.
Zingkar a\angin
Zanah tui taka kan mut hnuin dar 5:30 velah kan tho a, sum kan ngah loh avangin thingpui sen thlumin bul kan \an a, a \hen zing \awng\ai inkhawmah an kal bawk a, ti chuan dar 6 velah kan hna chu kan \an ta a.
Mistiri kan tam!
Kan kal dawnah khan mistiri 3 tal kan awm loh chuan kan kal ngam dawn em ni kan ti a. Mahse in sak kan han \an a, mistiri kan lo tam khawp mai. Kan Secretary te chenin pencil kan bengzeh far mai a. Ban khur cho mistiri te, perek inches 3 leh inch 1 mistiri te kan kat nuk mai. Tv Gos-a leh a hote phei chuan ban khur zawm thlengin an lo thiam vek mai!Nl Parte-i’n rangva ha karna a zawng nileng \hak a, a zawhna apiangah mi dangin an lo la hman zel si! A tawpah chuan a hmu ta nge ta lo pawh kan hre tawh lo.
Hel an tam!
Kan hriat angin kan hma lawkah hel hovin mi an ruk bo chuan Zoram a deng chhuak a, keini pawhin kan \awng\aipui a nih kha. Helho chu an lo huangtau na meuh mai. Hmun tinah an lo inrawlh hi a lo ni a. Kan thing kilh turah te chuan thir an lo phum ru a! Kan mistiri thiam tak tak ten perek an kilh kawih apiangin, "Helhovin thir an phum ru a nih hi," tiin kan mawhpuh ta zel a. Thing him piala vangvat siam thiam tak tak kan tam a. Tv Tlana chuan vangvat a siam apiangin perek leh perek a intawng a ti leh \hin a. Helho chu an chimawm tak zet a ni!
Chu mai a ni lo. Nl Thangliani an riahna hmun a\angin zik zakin a rawn tlan chho chiam mai a. Eng nge ni kan han tih chuan Tuikuk naupangin ngawi rengin an lo en a ni awm a! Hel emaw a lo ti chu niin! Min va han tihlim tak em!
Tunge thil lo chah \hin?
Kan thlen tuk a\angin thil zuar an lo kal \hin a, zawng\ah, bawnghnute, coconut adt a tam mai. "Hei in thil chah kha kan rawn keng a," an rawn ti mai \hin si a. Kan treasurer, represent leh fin. secretary te an inmawhpuh kual ta \hin a. Tu ber nge kan hre thei lo. |um khat phei chu pa pakhat hian bawnghnute a rawn keng a. Tuman lei zai an rel si lo. "Min chah si a" a ti a. "Tunge chah che" kan han tih chuan, tu emaw kawk pahin "Nangmah ang hi," a ti ringawt a. (Pa Mawia leh Pu Hmaa’n an inmawhpuh tawn! Tu zawk nge kan hre thei lo!) A kawh loh zawk zawk chu an ni ngei tih erawh kan chiang!
Pilot pawh kan tam!
Kan han mu a, silai tlir ri ni awm tak hi kan hria a. Hel tamna a nih avangin helho leh IR an inkap emaw ni chu aw... kan ti rilru a, a reh det a, a ai ringin a rawn tlir leh pawp pawp a, kan hlauthawng kan han \hu a, kan han ngaithla chiang a, Pa Mawia bulah hian Kawppuia chu tui takin a lo muhil a, a hnar chuan silai hi a lo tlir zawt zawt hi a lo ni a. Khawnuama work camp kan va neih khan pilot pahnih kan nei kan ti kha a ni a, tun \um zet chu pilot thiam tak tak, thlawk hniam thei tak tak kan tam mai! Cockpit hranpa siam chi pawh a ni lo. Room-in min daih lo hrim hrim! Pilot ho chuan airport-ah pawh thlawhnaah ngat lo chuan thla an la duh lo. Kan tarlang seng lo mai pawh a.
Kan hna chu...
Zing dar 6 a\anga dar 9 vel thleng kan thawk a, chaw ei khamah thawk lehin thim thleng kan thawk leh a, zanah dar 10 vel thleng kan thawk leh \hin.
Ni khatnaah kalkhang kan rem zo va, zanah chokut kan siam a, ni hnihnaah a chung chih theih turin kan peih a, a chhuat kan rem bawk a. Zanah kan inkhawm.
Ni thumnaah in chung kan chih zo va, a bang kan ping fel bawk. Zanah a chhuat kan kilh a, eirawngbawlna leh tui dehna kan siam bawk. Ni linaah pindan leh bathroom kan siam a, zanah electric kan fit a, a tukah tukverh leh kawngkhar kan vuah leh a. Ti chuan kan hna chu kan zo thei ta a.
Lam ang kan lo let leh ta
Dar 10:40-ah kan rawn chhuak a, kan rawn tlan ngar ngar a, thlawhna thlawk lai en kan tum lah chuan min lo thlawhsan tawh si. Mahse a hnuhnung zawk kan nang a, a thlawnin terminal building-ah kan lut thei hlauh a, a thlawk chhuak lai ngei chu kan va thlir thei ta a. Selingah chaw kan ei a. Ti chuan darkar 16 zet kan zin hnu chuan zing lam dar 3:40-ah Biak In tual kan rawn thleng thei ta a ni.
Chanchin ngaihnawm tak tak awm mah se kan hmunin min daih si lo. Heti chinah hian i duhtawk teh ang.
