Bible Sunday

Dated Tlangsam, the 4th Dec, 2011Vawiin hi Bible Sunday a ni a, Bible Society of India (BSI) zawmtu Kohhran hrang hrang ten hemi pual hian programme an hmang ang. Presbyterian Kohhran chuan Inkhawm tum khat atan programme a duang a, chawhnu emaw zan inkhawmah emaw, Kohhrante remchan dan angin hman theih a ni ang. Kumin Bible Sunday thupui atan hian ‘Mittui tla chunga tuhte chuan hlim takin an at ang’ (Sam 126:5, 6) hman a ni ang. Bible Society puala thilpek lak khawm tur a ni a, Branch Treasurer emaw Tualchhung/Local Collector-te hnenah emaw theh luh tur a ni.

Kum 2011 hi Bible Society tan kum pawimawh tak a ni a. Saptawng Bible chhuak hmasa King James Version chuan a kum 400-na hmel a lo hmu ta reng mai a. United Bible Societies chuan hemi denchhen chuan kumin hi Bible letlingtute kum (Year of the Translators) atan a puang hial a ni.

Bible Society of India pawhin a kum 200-na (Bi-centenary) a hman mek kharna hun pawimawh leh urhsun tak chu February 21 khan a hmang tawh nghe nghe a ni.