DUHTHLANNA

C. Hmingthantluanga

    Khawvela miropui leh thiltithei, hausa leh langsar tam tak hi thutlukna felfai tak siama duhthlanna dik an neih avanga chutiang dinhmun a lo chuangkai thei chu an ni chawk a; chutih laiin mi \henkhat chuan duhthlanna an siam fuh loh avangin harsatna leh manganna tawkin dinhmun \ha lo an chan phah a, pa taima tamtak tha leh zung thlengin a thlâwn hial fo bawk a ni.
    Bible chanchin a\anga duhthlanna leh thutlukna siam fuh leh siam fuh lo tlêm azâwng lo tarlang teh ang:-
    ESAUVA : Esauva |âmchhâwl khan duh a thlang sual hle a; chhang leh dailuah chhum kâwiin a fa tir nihna a nau Jakob-a hnenah a hralh ringawt mai tih kan hria a ni.
    Kan harsatna tawh avanga mahni zahawmna leh chanvo hloh phah khawp hial theih lakah hian kan inven fimkhur fo a ngai takzet a ni.
    GEHAZIA : Elisa chhiahhlawh Gehazia pawh khan a tifuh lo khawp mai, a pu tih loh chungin Naaman hnen a\angin thilpêk dilin a lâksak vei a, Naamana phârin a man ta a; chubâkah, kumkhuain phâr chuan a thlahte thlenga a man tur thu pawh kan hre tel bawk.
    ‘Thamna’ ni chiah a lang lêm lo, ‘thilpêk’ anga ngaih theih; mahse dik si lo hi keiniho pawh hian kan lo fanghma no ei fo tawh hial ang em?
    JUDA ISKARIOTA : Ani hi a chanchin hriat zuitlâk loh khawpa duhthlanna leh thuthlukna siam dik lo ve tak pakhat chu a ni. A Lalpa chu sum leh pai tlêmtêin a hralh vei a, a sawhkhâwk chu na tak a ni thung tih kan hria.
    Juda Iskariota anga Lal Isua aia sum leh pai thlang zâwka la thâmral mai mai tur hi kan awm nual ngei ang.
    MOSIA : Mosia kha a dang-âwk avang khan tunlaia kan zinga khawsa ve chu ni ta se, mite nuihzat leh biak chhawhchhi tur chi a ni hial awm asin mawle! Mahse Pharoa fanu a fapa a awm a, nuam tinrêng tâwla awm-âwl leh ei tui hna pui bera neih chu thlang loin, ama mite nena tihduhdah leh hreawm tuar a thlang zâwk a; a duhthlanna fuh avangin hruaitu ropui hmingthang a nih bakah, vantirhkoh ai pawha chungnung a lo ni ta zâwk a ni!
    Keini pawh hian duhthlanna siam  thei in min siam a, chuvang chuan kan duhthlanna hi kan hman thiam ve a ngai a, fingtaka sual kawngah chuan rul anga kan fin a ngai a, thuro anga kan nun a nem a ngai tih hi hre nawn leh  ang u.