Eng chhuak tur kan ni

C. Hmingthantluanga

Matthaia 5 14-16 ah chuan “Khawvel eng in ni e. Tlang chhipa khaw awm chu thuhruk theih a ni lo Miin Khawnvar halin hrai hnuaiah an dah ngai lo, a dahnaah an dah zawk thin;tichuan in chhunga mi zawng zawng a en thin.   
    A chunga thu kan hmuh ang khian a chiang hle awm e, Ringtute hi midangte laka dnglam a, eng chhuak tur kan ni tih hi kan hriat a pawimawh khawp mai. Mi tamtak chuan danglamna kan nei thin lo va, ringlo te nena danglamna awm miah loin kan khawsa fo thin a ni. Krista tana danglam ngam kan nihna hmun turah hian kan danglam thin loh avangin miten kan nunah ei leh in turm chawlhna an hmiuh loh avangin kan zinga khawsak pawh hi an lo chaklo fo thin a ni. chang 17 ah chuan “Chutiang bawkin in eng chu mi mit hmuhin eng rawh se, chutichuan in thil tih
thatte an hmu ang a, in Pa vana mi an chawimawi thei ang.” a ti leh a, a awmzia chu kan nunah Krista hmel, Isua zia leh nihna an hmuh hunah chuan kan bula awma khawsak kha an chak anga, tichuan Pathian an chawimawi thei dawn a lo ni.
    Kan nitin hnathawhna leh kan eizawnna hmun ah pawh miten tunge a ni min tih? thatchhia nge? zawmthaw tak nge? taima, rinawm tak kan nih? heng zawng zawng ah hian kan in enfiah a ngai khawp mai, Taima taka thlan chhuak zawih zawiha thawk chhuak a, kan ei leh in tur te thawk chhuak tur kan nih laia, awlsam taka sum hmuh leh hausak thut tumna hian kan rilru a hruaikawi a, chu chuan thil tha lo min tih tir thin a ni. Tun laia kheh puam a lar a, tamtak chuan an hausak pui a, an nawm phah khawp mai, mahse chutihlai chuan hlet a lo nei thin a , hrisel lohna leh harsatna te a lo thleng leh thin a ni. chutiang ang ti te chu mite lakah an eng chhuak thei ngai lova, rawngbawltu an lo nih pawhin miten an sawi ru a, an ngaisang lo thin a, kohhran dang te phei chuan a kohhran thlengin ar chuk tuilo khawpin an sawi duh thin a ni. Chuvang chuan kan eizawnna leh kan hna ah hian mite tana eng chhuak tur chuan kan taimak a, kan thianghlim a, kan rinawm bawk a ngai a ni.
    A tawp ber ah chuan tunlai hian kan kohhran ah hlimna a lo thleng mek a, heng hlimna te hi kan duat a, dimdawi deuhin kan enkawl a ngai, engtin maw? Kan mihlimte rilru na zawng leh fiamthu anga tawngkam mei nei deuh leh en dan dang deuh a en te kan ching tur a ni lo, chutilo chuan hlimna hi neih a har a, amaherawh chu mi pakhat tawngkam leh che zia avangin a khaw lo thei tih pawh hi kan hriat a pawimawh khawp mai. Chuvangin kan fimkhur a, kan lo dawh thiam a, kan lo duat thiam a pawimawh khawp mai, Chutih rual chuan kan mihlim te pawh an fimkhur a, Lalpa thu a ni em? tawngtaina nen an ngaihtuah anga, an fimkhur pawh thil pawimawh leh tul tak a ni tih an hriat a pawimawh khawp mai. Thim ah chuan eng chu a fiah thin a, mi a en fo thin a, keini pawh eng chhuak tur kan nih chuan rawngbawlna kawng hrang hrang kan chelh ah te, Committee ni khua ah te, kan thian kawmna ah te, kan inchhung ah leh kan thian kawmna ah, kan bula awm leh kan hnaih apiangte hnenah kan en chhuahna turin theihpatawp chhuahin Lalpa hnen ah a tharin i inhlan ang u.