PENTIKOS NÎ

Dated Tlangsam, the 27th May, 2012

Luka 24:49. Tirhkohte 1:4,5. 2:1-4
- Lalthlengliana Fânai

Pentikos hi Juda-te Kût pathum zinga Pakhat a ni a, Juda-ho hian Jerusalem a\anga Km. 32 hual chhunga mipa puitling zawng zawng kal khawmna tur Kût Pathum an nei a - Kalhlên Kût, Pentikos Kût leh Bâwkte Kût (Pentikos Kût hi Chawlhkar Kût an ti bawk)

Dan naranin Kalhlên Kût hi April thla laihawl velah a in\an a, June thla chawhma lamah Pentikos Kût hi a lo thleng leh \hin a ni. He hun hi Juda-te zin khawthawn nawm hun lai tak a ni a, Jerusalem lamah an fuankhawm nasa \hin hle a ni. Jerusalem a\anga Km. 32 bial chauh pawh ni lovin, ram danga pem tawh te pawh he an Kût ah hian an sakhaw hmunpui Jerusalem hi an pankhawm hram hram \hin a ni. Thlaarau thianghlim lo thlen nî (Pentikos nî) a Petera thusawi a\angin mi 3000 lai piangtharin baptisma an chang hial a nih kha. chuvangin thlarau thianghlim a lo thlen nî a mipui \hahnem tak lo pungkhawm pawh kha hmun hrang hrang a mi ni âwm rêng an ni. Kan Bible-ah Pa thil tiam, Jerusalema nghah tur thu kan hmu a, Luka 24:49 leh Tirhkohte 1:4,5.

Kan Lal Isua an khenbeh hun lai kha Kalhlên Kût lai a ni a, Kalhlên Kût an hman a\anga ni 50-na tur a lo hnai zel a,  Jerusalemah pawh mi an pungkhawm leh \an tawh a. Petera leh zirtir dangte pawhin inhmuhkhawmna hmun an ruat ve a. Isua duh dan angin Jerusalemah hian a zirtirte leh a thu awihhinte chu an awmkhawm \hap reng a. Pentikos Kût lo thlen lai pawh hian in pakhat, pindan chungnunga an awmkhawm lai a ni (Mi 120 an ni). a lo thleng ta phut a. Chu chuan an thutna in chu a tikhat ta vek a, leite te, amaha insem darhin, mei angin an hnenah a lo inlar ta a. An chungah a chuang theuh va, an zain Thlarau Thianghlimin an khat ta vek a, Thlarauvin a tawngtir ang zelin tawng dangin an lo tawng ta a. Kût hmangtu dangte pawh an thawm hria in an tlan khawm a, an \ang awmzia an hre vek bawk si a mak an ti hle a ni.

Ti chuan Petera chu sawm leh pakhatte nen an ding za a, an mahni thlirtu mipui hnenah chuan thu a sawi ta a. Isua chu Chhandamtu a nih thu te leh Isua chanchinte a sawi zel a, chung thu an hriat chuan an thinlung chu vih ang maiin a lo na hlawm a, Petera leh Tirhkoh dangte hnenah chuan, “Unaute u, engtin nge kan tih tak ang”? an ti a. Petera’n an hnenah “Sim ula, in sual ngaihdam nan Isua Krista hmingin baptisma chang rawh u; ti chuan, thlarau thinghlim pêk hi in chang ve ang. He thu tiam hi nagnni tan pawh, in fate tan pawh, Lalpa kan Pathianin a hnena a koh apiangtte tan a ni e,” a ti a. Pentikos nî hian mi 3000 lai in baptisma an chang a ni.

Keini hi kan rawngbawlna ah \hiante nen kan ding za em? Petera kha zirtir sawm leh pakhatte nen an ding za a, an in\anpui tawn a ni ngei ang. Rawngbawlpui te nen kan din dun loh a kan mal tlat a nih chuan kan ti diklo mai thei a ni. Isua thih a\anga ni 50-na Pentikos nî ah a zuitute’n thlarau thianghlim an chang a, kei, nang hian Isua thihna kan \awmpui a a hnung kan zui a\anga ni engzatah nge thlarau thianghlim kan chan? Engtik nge i Pentikon nî chu ni ve ta?