Editorial...

        Pathian malsawmna kohhranhoten kan dawng a, zantin inkhawm hun kan hmang thin a, a lawmawm hle mai. Chutih rual chuan thlarau lam thilpek tharte dawngin thlarau lamah pawh hma kan sawn zel niin a lang a. Pathian malsawmna a thlawna kan dawnte hi kohhran mipuite hian  kan hlut thiam a, fimkhur taka kan kalpui thiam a tul hle a. Inkhawm ah theih tawp chhuah zel a pawimawh hle.
    Harhna kan chante hi kohhran hian kan sawtpui tur angin kan sawtpui em? Sawtpui lo angin kan lang ve fo thin em? Hei hi engvang nge ni ang? Harhna kan chan hian kohhran minti pumkhat tur a ni a. Rawngbawlna kawng hrang hrangah phurna leh tha thona min pein, kohhran rawngbawlna min ngaih pawimawh tir tur a ni a. Pathian ram thilpek ah tan min lak tirin, malsawmna minpetu tan inpek leh in sen let ve duhna thinlung min pe tur a ni a. Kohhran inpawlkhawmna min thlakhleh tirin, Bible chhiar taimakna leh tawngtai ngainatna min neih tir tur a ni a. Pathian hmangaihna tak tak min neih tir bawk tur a ni.
    Harhna changa kohhranhote kan inkhawm mek lai hian kohhran inpumkhatna siamtu nge, inrem lohna siamtu kan nih. Harhna dik changtu chuan inremna leh kohhran leh a neitu Krista hmangaihna a pianpui thin. Mahni ngaih a intifing lo tur a zirtirna dawng kan ni. Kohhran a cheng leh khawsa mek harhna changtute  hian eng nge kan pian chhuahpui le?