LALPA I CHAWIMAWI ANG U

Isaac Zairemtluanga

   Lalpa chuan, “Mi chawimawi a piangte chu ka chawimawi ang a, mi hmusit apiangte chu ka ngaihnep an ni dawn si a.” I Samuela 2:30
    “Aw, Lalpa chawimawiin hla thar sa ula,: Leilung luah zawng zawngte u, Lalpa chawimawiin zai rawh u. Lalpa chawimawia hla sain, a hming fak ula; Nitin a chhandamna thu chu hriattir rawh u.” Sam 96:1,2.
   Lalpa chawimawi leh fak hi ringtu tan a va pawimawh em! A pawimawh mai ni lovin Lalpa fak leh chawimawi hi kan tih tur a ni. Kan hnathawhna hmun leh ni tina kan awmna apiangah kan sawi duh zawng leh kan tih duh zawngten Lalpa a chawimawi em? Mahni inngaihtuah chunga Lalpa fak leh chawimawi thei turin i inbuatsaih ang u.
    Khawvela kan awm chhung hian Pathianin min venna leh a malsawmna kan dawn zozai avang hian kan fakin kan chawimawi tur a ni. Lalpa fak leh chawimawi hi tih tak zet a ngai a, Lalpa kan fak leh chawimawi dan hi Bible a amah fak leh chawimawi dan tur kan hmuh anga fak leh  chawimawi kan ni em? Lalpa fak leh chawimawi kan lo in tih dante inbih chiang leh ila.
    Joba chuan, “Beng hriatna mai zawngin ka hre tawh chia, mahse tunah zawng ka hmu ta che, chu vang tak chuan ka inten a, vut leh vaivuta thuin ka sim ta e,” a ti ang hian Lalpa kan fak leh chawimawi danah sim tur kan nei ve mai thei a ni. Lalpa fak leh chawimawi reng a kan inngaih lai hian Lalpa hmel tak hmu si lo leh simna tak nei a chang der si lo hian Pathian hi kan fak in kan chawmawi mai lo maw?  Joba ang hian simna dik tak thinlung neiin, Pathian hmaah in hmu chiang chungin Lalpa i fakin i chawimawi thar zel ang u.
    Lalpa chawimawiin hla thar sa ila, chutiang a nih chuan thinlung tharah Lalpa a lo lut ang a, pawn lama Isua kha chhung lama Isua a lo ni tawh ang. Thlarau rah a lo lang ang a, Lal Isua zia a lo par chhuak tawh ang. Chutiang taka Lalpa kan fak a kan chawimawi a nih chuan kohhran nuam leh hlim kan nei reng ang. Chuvangin, Kohhran mipui zawng zawngte hian Lalpa i chawimawi ang u.